Sumqayıt Şəhər İcra Hakimiyyətinin başçısı Zakir Fərəcov veteran futbolçu, "Şöhrət ordenli", "Azərbaycan Respublikası Prezidentinin fəxri diplomu" ilə təltif edilən İsgəndər Cavadovu qəbul edib.
Sumqayit24.az xəbər verir ki, görüşdə Şimal Regional Futbol Federasiyasının (ŞRFF) prezidenti Fərhad Həsənov, həmçinin veteran futbolçu Asəf Əliyev də iştirak edib.
İcra başçısı Cavadovu 70 illik yubileyi münasibətilə təbrik edib. Eyni zamanda veteran futbolçuya futbolun inkişafındakı xidmətlərinə görə də təşəkkür edib. Zakir Fərəcov daha sonra İsgəndər Cavadova və eləcə də digər qonaqlara Sumqayıtın 75 illiyinə həsr olunmuş kitab hədiyyə edib. Futbol veteranları isə icra başçısına "Regional Futbol Federasiyası"nın fəxri fərmanını, həmçinin arxasında 50 rəqəmi yazılmış milli komandanın forması və futbol veteranlarının imzası olan top hədiyyə ediblər.
Görüş zamanı ŞRFF prezidenti Fərhad Həsənov şəhərin 9-cu mikrorayonunda tikintisi davam edən yeni futbol meydançası haqqında da icra başçısına məlumat verib.
