Sumqayıt şəhərində həyata keçirilən "Jasmine Park Sumqayıt" layihəsinin mətbuat katibi Nəsimi adına Mədəniyyət və İstirahət Parkında yaşıllıqların məhv edilməsi ilə bağlı iddialara münasibət bildirib.
Sumqayit24.az xəbər verir ki, Tünzalə İsmayılova açıqlamasında iddiaların həqiqəti əks etdirmədiyini deyib.
Qeyd olunub ki, layihə Sumqayıt Dəniz Bulvarı ərazisində yerləşir və tikinti prosesi təxminən 10 ilə yaxındır davam edir. Bildirilib ki, bütün işlər qanunvericiliyin, şəhərsalma və ekoloji normaların tələblərinə uyğun şəkildə həyata keçirilir.
Mətbuat katibinin sözlərinə görə, tikinti zamanı yaşıllıqların qorunmasına xüsusi həssaslıqla yanaşılır və ağacların kəsilməsi və ya məhv edilməsi ilə bağlı səsləndirilən iddiaları təsdiqləyən hər hansı rəsmi fakt mövcud deyil:
"Ətraf mühitin qorunması fəaliyyətimizin əsas prioritetlərindən biridir".
Xatırladaq ki, bir neçə gün əvvəl Sumqayit24.az-a müraciət edən bir qrup şəhər sakini Nəsimi adına Mədəniyyət və İstirahət Parkında yaşıllığın məhv edildiyini iddia edib. Məsələ ilə bağlı Sumqayıt Şəhər İcra Hakimiyyətinə göndərdiyimiz sorğu cavabsız qalıb.
