Layihə çərçivəsində illik 1440 ton polipropilen və 1680 ton laminatlı kisə istehsalı planlaşdırılır.
Sumqayit24.az xəbər verir ki, bunu "Nun" MMC-nin direktoru Ələsgər Mustafayev jurnalistlərə açıqlamasında deyib. O qeyd edib ki, şirkət hazırda kisə istehsalı ilə məşğul olan sənaye müəssisəsidir.
"Şirkətimizə Sumqayıt Kimya Sənaye Parkının rezidentliyi verilib. Hazırda istehsalımız müvəqqəti olaraq başqa ərazidə həyata keçirilsə də, bu layihə çərçivəsində yeni və müasir istehsal sahəsinin sənaye parkının ərazisində qurulması nəzərdə tutulur",- Ə. Mustafayev bildirib.
Layihənin məqsədinin daxili bazarın tələbatını ödəmək olduğu bildirilib:
"İstehsal olunacaq kisələr əsasən kənd təsərrüfatı, sənaye və tikinti sahələrində qablaşdırma üçün istifadə ediləcək. İstehsalda əsas xammal kimi "SOCAR Polymer" müəssisəsinin yerli polipropilen məhsullarından istifadə olunacaq".
Direktor qeyd edib ki, istehsal prosesi Almaniya texnologiyası əsasında qurulacaq, bu da məhsulların keyfiyyətinin yüksək səviyyədə olmasına imkan verəcək:
"Layihənin ümumi dəyəri 11,2 milyon manatdır. Maliyyələşmənin 70 faizi təsisçi vəsaiti, 30 faizi isə güzəştli kredit hesabına təmin olunur. Layihə nəticəsində 140 nəfər üçün daimi iş yerinin yaradılması nəzərdə tutulur. Bu müəssisə yerli istehsalın genişlənməsinə və qeyri-neft sektorunun inkişafına mühüm töhfə verəcəkdir".
