Xəbər verdiyimiz kimi, Sumqayıtda fəaliyyət göstərən "Nauka" Tədris Mərkəzi ilə bağlı azyaşlıya qarşı fiziki zorakılıq iddiaları səsləndirilib və məsələ ilə bağlı polis tərəfindən araşdırma aparılır.
Yayılan məlumatlardan sonra "Nauka Tədris Mərkəzi"nin direktoru Pərvanə Quliyeva Sumqayit24.az-a açıqlama verib.
Açıqlamanı təqdim edirik:
"Son günlər "Nauka Tədris Mərkəzi" ilə bağlı yayılan məlumatlarla əlaqədar olaraq rəsmi açıqlama vermək məcburiyyətindəyəm.
İlk növbədə bildirmək istəyirəm ki, uşaqlara qarşı hər hansı fiziki zorakılıq bizim mərkəzin qəbul etdiyi və ya qəbul edə biləcəyi bir davranış deyil. Uşaqların təhlükəsizliyi və sağlam mühitdə təhsil alması bizim üçün hər zaman əsas prinsip olub.
Yayılan materiallarda mərkəzimizin müəlliminin uşağı döydüyü, hətta çubuqla vurduğu barədə ağır iddialar səsləndirilib.
Bu iddiaları qəbul etmirik və həmin məlumatların həqiqətə uyğun olmadığını bildiririk.
Hadisə ilə bağlı müəssisədə müşahidə kameralarının görüntüləri mövcuddur. Sözügedən valideyn özü yaxınlaşıb, videoları izləyib. Bununla bağlı şahidlərimiz var.
Mən bir mərkəz rəhbəri olaraq hər hansı uşağın hüququnun pozulmasına göz yummaram. Əgər müəllimimiz tərəfindən belə bir hal baş versəydi, ilk növbədə məsələni özüm ciddi şəkildə araşdırardım.
Lakin baş verməmiş bir hadisənin baş vermiş kimi təqdim edilməsi və bunun nəticəsində illərlə fəaliyyət göstərən təhsil müəssisəsinin, əməkdaşlarımızın və şəxsən mənim nüfuzuma zərər vurulması qəbulolunmazdır.
Biz məsələ ilə bağlı bütün sübutları qoruyub saxlamışıq və hüquqi müstəvidə hərəkət edəcəyik.
Bu açıqlamanı valideynlə mübahisə etmək və ya kimisə ictimai şəkildə hədəfə çevirmək üçün etmirəm. Məqsədim yalnız həqiqətin obyektiv şəkildə araşdırılması və ictimaiyyətə düzgün məlumat verilməsidir.
"Nauka Tədris Mərkəzi" olaraq fəaliyyətimizi bundan sonra da uşaqların təhlükəsizliyi, təhsili və inkişafı prinsipləri əsasında davam etdirəcəyik.
Həqiqətə inanırıq və bütün sübutların obyektiv araşdırılmasını tələb edirik.
Heç bir şiddət görən uşaq mərkəzə qayıtmaq üçün bu qədər ağlamaz və ya geri dönməyə çalışmaz".
