Sumqayıt şəhərinin Babək küçəsində avtomobillərin sıxlığının daha da artacağı gözlənilir.
Sözügedən ərazidə bir sıra mağazalar və ticarət mərkəzləri fəaliyyət göstərir. ("Gold Qayalı”, "İrşad Electronics", "Kontakt Home", "Hiper”, "Sumqayıt Mall" və s.). Xeberle.com-un məlumatına görə, "Kristal Abşeron” MMC-yə məxsus binanın altında 2-ci "Qayalı” marketin də açılacağı gözlənilir. Bundan əlavə, həmin binanın sol tərəfindəki ərazidə isə yeni yarmarka qurulacaq. Hazırda bununla bağlı hazırlıq işləri də aparılır.
Sumqayıtın bu ərazisində hər gün pik saatlarda tıxac müşahidə edilir. Bəzən isə avtoqəzalar, piyada xəsarətləri və ölümləri də baş verir. Lakin təəssüf ki, bu obyektlərin heç birinin yeraltı qarajı, yaxud praktik parklanma yeri yoxdur. Avtomobillər çox zaman 2 cərgə olmaqla yolu zəbt edirlər.
Əgər Babək küçəsində adları çəkilən yeni ticarət mərkəzləri fəaliyyətə başlayacaqsa, ərazinin xaotik vəziyyətə gəlməsi qaçılmaz olacaq. Təbii ki, bütün bunlar ərazidə yaşayan sakinlərin narahatlığına səbəb olan amillərdəndir.
Düşünürük ki, aidiyyəti qurumlar tərəfindən bu məsələlərə xüsusi diqqət yetiriləcək, alternativ variantlar nəzərdən keçiriləcək.
