"Xəstəyə baxan özü xəstə düşür. Ruh halı çökür. Özünə belə kimsə lazımdır ki, səni ruhlandırsın. Çətin prosesdir. İnsanı ölüm böyütmür, düşdüyü vəziyyətdə dirilmək böyüdür, xəstəxana küncləri, ona baxmaq, qarşıdakının ağrı çəkdiyini görmək böyüdür. Ölümə qədər o qədər şeylər olur ki, sən hər gün böyüyürsən".
Bu sözləri aktrisa Zülfiyyə Qurbanova "Qapqara" yutub layihəsində deyib. O, qan xərçəngindən əziyyət çəkən bacısından və onun vəfatından danışıb:
"Yas tutmağa macal tapmadım. Məsuliyyətlərim çox idi. Yas tutub 3 körpəni taleyin ümidinə buraxa bilməzdim. İkimiz də subay olsaydıq, övladlar olmasaydı, illərlə yas tutardım. İnsan bunu həyatı boyu tuta bilər. Bütün məişət işlərini görərkən yas saxlayırsan. Həyat qayğısının içindəsən. Bu da normal yas saxlayanlardan daha ağırdır. Sən tam təmizlənmirsən.
Bacımın övladlarının ataları da yanlarındadır. Biz onları ikimiz böyütdük. Bir ananın edə biləcəyi hər şeyi edirəm. Vicdan dünyada tapılmayan bir hissdir. Hər kəsi sevə bilərik, amma gözümüzdən düşə bilər. Bacımın 3 balasını qoruyuram".
