Sumqayıtda sürücülərin narazılığına səbəb olan yollardan biri nəhayət bərpa edilir.
Sumqayit24.az-a müraciət edən sakin bildirib ki, Heydər Əliyev prospektinin 34-cü məhəllədən keçən hissəsində yeraltı boruların təmiri və yenilənməsi məqsədilə yol qazılmışdı. Uzun müddət asfalt örtüyünün bərpa olunmaması həm hərəkəti çətinləşdirir, həm də ərazidə tıxacların yaranmasına səbəb olurdu.
Vətəndaşın sözlərinə görə, yolun çökmüş hissəsindən keçən avtomobillər dəfələrlə problemlə üzləşib, bəzi nəqliyyat vasitələrinin alt hissəsi zədələnib.
Bu gün isə ərazidə nəhayət asfalt örtüyünün çəkilməsinə başlanılıb və yolun əvvəlki vəziyyətinə qaytarılması istiqamətində işlər görülür.
