"Kərə yağı qiymətləri adekvat səviyyədə qalxmayacaq, süni qiymət artımı olacaq. Çünki istehsalçılar, idxalçılar və satıcılar hökumətin bu cür qərarlarından maksimum yararlanmağa çalışırlar".
Bu sözləri Demokrat.az-a açıqlamasında Azad İstehlakçılar İctimai Birliyinin sədri Eyyub Hüseynov deyib.
O bildirib ki, real artım 15% olsa belə, bunu 30% kimi tətbiq edəcəklər:
"Təcrübə göstərir ki, adətən proses bu cür gedir. Yağ qıtlığı olan bir ölkədə hökumətin bu qərarı istehlakçılar üçün zərərli nəticələr yaradır. Ölkədə artıq bir ilə yaxındır ki, həm süd, həm də yağ qıtlığı mövcuddur. Bu sahədə xarici bazar daha aktivdir. Ona görə də qiymət artımı nəzərəçarpan dərəcədə olacaq".
Qeyd edək ki, bu ildən etibarən kərə yağı idxalına tətbiq edilən vergi 7%-dən 15%-ə qaldırılıb.
