Ötən ay Yasamaldakı yanğında həlak olan sumqayıtlı Samir Məhəmmədovun həyat yoldaşı sosial şəbəkə hesabında ürəkdağlayan paylaşım edib.
Sumqayit24.az Marta Ramazanovanın paylaşımda yazdığını təqdim edir:
Bu, bizim ailəmizdir. Bir ay əvvəl – 21 noyabrda bu ailə birdəfəlik dağıdıldı.
Həyat yoldaşım Samir Azərbaycanı çox sevirdi, ölkəsi ilə qürur duyurdu və ədalətə nail ola biləcəyinə inanırdı.
Artıq bizim ailəmiz yoxdur. Heç bir söz, heç bir üzrxahlıq bunu geri qaytara bilməz.
Mən inanıram ki, istintaq günahkarları cəzalandıracaq. Samir də buna inanırdı. Məhz buna görə o, təslim olmurdu və sona qədər mübarizə aparırdı.
Amma o, çatdıra bilmədi. Onun ölümü haqlı olduğunun sübutu oldu. Bu, obyektin istismarı zamanı yol verilən pozuntuların insan həyatı üçün nə qədər təhlükəli olduğunu göstərdi. Samirin ölümü obyektin sahibi Vüqar Abbasovun məsuliyyətsizliyinin, vicdansızlığının və doymazlığının nəticəsidir.
Artıq bizim ailəmiz yoxdur. Mən də artıq yoxam — Samirlə birlikdə mən də öldüm.
Uşaqlarım hər gün onların dayağı olan, onları sevən, qayğıkeş və güclü bir atadan məhrum qaldılar.
Mənim istədiyim yeganə şey ədalətdir.
Mən istəyirəm ki, ailəmizin məhvi cəzasız qalmasın.
Xahiş edirəm, bu vəziyyətdə məni tək qoymayın. Mənə dəstəyiniz çox lazımdır. Paylaşımlar edin ki, bu hadisə mümkün qədər çox insana çatsın. Xahiş edirəm, susmayın".
