Yayda şirin sərinləşdirici içkilərin tez-tez qəbulu, fasiləsiz qəlyanaltılar və çox isti-soyuq qidaların birlikdə yeyilməsi diş minasını zədələyərək kariyes və damaq iltihabı riskini artırır.
Bu barədə rusiyalı stomatoloq-terapevt Pavel Lısenkov danışıb.
Onun sözlərinə görə, limonad, şirə və soyuq çay kimi şəkərli içkilərin tərkibindəki şəkər və turşular bakteriyaların çoxalmasına şərait yaradır, diş minasını zəiflədir. Gün ərzində bu içkiləri kiçik qurtumlarla içmək dişlərin turşuların təsiri altında daha uzun qalmasına səbəb olur.
Həkim bildirib ki, meyvə və giləmeyvə faydalı olsa da, tərkibindəki turşular minanı müvəqqəti zəiflədir. Buna görə də onları yedikdən dərhal sonra dişləri fırçalamaq olmaz, əvvəlcə ağzı su ilə yaxalamaq, sonra isə 30-40 dəqiqə gözləmək tövsiyə edilir.
Lısenkov əlavə edib ki, dondurma ilə isti qəhvə kimi kəskin temperatur fərqi olan qidalar dişlərdə mikroçatlar yarada və həssaslığı artıra bilər. Tətil dövründə dişlərin müntəzəm təmizlənməsinin unudulması, tez-tez qəlyanaltı etmək və az su içmək də ərpin toplanmasına, kariyes və damaq iltihabının yaranmasına şərait yaradır.
Mütəxəssis diş sağlamlığını qorumaq üçün ağız gigiyenasına əməl etməyi, qida qəbulları arasında fasilə verməyi, kifayət qədər su içməyi və çox isti-soyuq qidaları birlikdə qəbul etməməyi tövsiyə edib.
Mənbə: "İzvestiya"
