Sumqayıtda 10 mindən çox əhalisi olan qəsəbənin rəsmi statusu yoxdur. Bu haqda 19 may tarixində Sumqayıt24 məlumat verir.
Söhbət “Stansiya Sumqayıt” yaşayış məntəqəsindən gedir. İllərdir adsız qalan ərazidə dövlət idarələri, tibb məntəqəsi, aptek, uşaq bağçası, xeyir-şər evi mövcud deyil.
Burada, həmçinin qəsəbəarası küçələrin adı yoxdur. Taksi və yaxud təcili tibbi yardıma ünvan söyləmək isə qəliz məsələdir. Avtomobili olan ailələr şəxsi maşınla, olmayanlar isə uzun intervalla işləyən avtobuslardan istifadə edərək Sumqayıt şəhərinə gedib-gəlməyə məcbur qalırlar.
Millət vəliki Tahir Mirkişili ARB Xəbər-in sorğusuna cavab olaraq bildirib:
“Keçən müddət ərzində bu problemlərin həll olunması üçün biz də müvafiq dövlət orqanlarına həm müraciət etmişik, həm görüş keçirmişik. Mən əminəm ki, əslində yaxın müddət ərzində bu problemlərin bir çoxu öz həllini tapacaq”.
Millət vəkili onu da qeyd edib ki, əsas məsələ qəsəbəyə rəsmi statusun verilməsidir. Bunun üçün artıq lazımi sənədlər toplanıb və yaxın günlərdə Milli Məclisə təqdim ediləcək. Bundan sonra qanunverilicikdə dəyişikliklər edilərək yaşayış məntəqəsinə rəsmi status verilməsi mümkün olacaq.
