Kölgə iqtisadiyyatı qurmaqla ölkədən qaçaq yolla 326 milyon manatlıq məhsul çıxarmaqda və qanunsuz sahibkarlıqda ittiham olunan şəxslərinməhkəməsi davam etdirilib.
Qafqazinfo-nun məlumatına görə, Sumqayıt Ağır Cinayətlər Məhkəməsində baxılan iş üzrə Şirinov Elvin Valeh oğlu, Hidayətov Zöhrab Raqub oğlu və Hümbətov Qaçqın Şura oğlu mühakimə olunur.
Onların cinayət əməlləri Dövlət Təhlükəsizliyi Xidmətində (DTX) aparılan cinayət işi üzrə ifşa edilib.
Bundan əvvəlki iclas təqsirləndirilən şəxslərin iş materialları ilə tanış olmamaları səbəbindən yarımçıq qalmışdı. Hakim Fəhmin Hümbətovun sədrliyi ilə keçirilən hazırlıq iclasının davamında işin məhkəmə baxışına verilməsi və qətimkan tədbirlərinin dəyişdirilib-dəyişdirilməməsi müzakirə edilib.
Şirinov və Hidayətov sərbəst mühakimə edilmək istəyiblər. Bakı İstintaq Təcridxanasından onlayn qaydada məhkəməyə qoşulan müttəhimlər barələrində seçilmiş qətimkan tədbirinin ev dustaqlığı qətimkan tədbiri ilə əvəz edilməsini xahiş ediblər. Tərəflər başqa heç bir vəsatət qaldırmayıblar.
Hakim qətimkan tədbirlərinin dəyişdirilmədən işin məhkəmə baxışına verilməsinə qərar verib.
İlk baxış iclası noyabrın 7-nə təyin edilib.
Qeyd edək ki, təqsirləndirilən Elvin Şirinov barədə mətbuatda maraqlı detallar yer alır.
Ötən illər üzrə İqtisadi İslahatların Təhlili və Kommunikasiya Mərkəzi (İİTKM) “İxrac icmalı”larına əsasən, əvvəllər-məsələn 2021-ci ildə ümumiyyətlə qeyri-dövlət (özəl) ixracatçı subyektlər sırasında olmadığı halda, 2023-cü ildə qəfildən qeyri-dövlət ixracatçı subyektlərin sıralanmasında ilk onluqda 1-ci yeri tutub. Görünən odur ki, Elvin Şirinov adı əvvəllər heç yerdə getməyən, birgə ittiham edildiyi dustaq yoldaşı Zöhrab Hidayətov tərəfindən qurulmuş böyük kölgə iqtisadiyyatı maxenasiyasının iştirakçılarından yalnız biridir.
İş materiallarında bəhs etdiyimiz cinayətlərlə bağlı kifayət qədər faktlar yer alır. Məhkəmənin növbəti baxış iclasında daşların tək-tək yerinə oturacağı görünəcək.
