Bu gün Aprel döyüşləri şəhidi Raquf Orucovun doğum günüdür.
Polkovnik-leytenant Raquf İbrahim oğlu Orucov 1972-ci ildə Ağdam rayonunun Cinli kəndində anadan olub.
1990-cı ildə Sovet Qoşunlarında xidmət edən Raquf bir müddət sonra ordudan ayrılıb və Azərbaycan Ordusunun sıralarına qoşulub. Üç-dörd ay ərzində Fərrux dağı və Aranzəmin kəndində aparılan hərbi əməliyyatlar zamanı ayağından ağır qəlpə yarası alıb.
Zabit kimi 1996-cı ildə fəaliyyətə başlayan Orucov təyinatını Murovdağa alır. Kəşfiyyat bölüyü komandiri kimi xidmətinə davam edir və xidməti boyu polkovnik-leytenant rütbəsinə qədər yüksəlir. Hərbi xidməti dövründə həmişə ön cəbhədə xidmət edib.
Murovdağda həyata keçirdiyi uğurlu kəşfiyyat əməliyyatlarına görə “Murov Qartalı” ləqəbi alıb.
2016-cı ilin aprel ayının 4-də Ağdərə rayonunun Talış kəndinin erməni işğalçılarından azad edilməsi uğrunda Xüsusi Təyinatlı Qüvvələrin tərkibində polkovnik-leytenant Raquf Orucov sonuncu döyüşünə qatılıb və qəhrəmancasına şəhid olub.
Aprelin 5-də Sumqayıtda baş tutan dəfn mərasimində minlərlə insan, Müdafiə Nazirliyinin yüksəkrütbəli zabitləri iştirak ediblər.
Ölümündən sonra "İgidliyə görə" medalı ilə təltif edilib.
