ATU-nun şəhid tələbəsi Ruslan Məmmədovun ailəsi ziyarət edilib. Bu haqda 27 sentyabr tarixində Sumqayıt24 xəbər verir.
Ziyarətdə Azərbaycan Texnologiya Universitetinin (ATU) əməkdaşları – Elm və innovasiyalar üzrə prorektor v.m.i.e. Mayıs Gülalıyev, Ümumi və tətbiqi fizika kafedrasının müdiri Məntiq Cəfərov, Ümumi və tətbiqi riyaziyyat kafedrasının müdiri Hamlet Kəsəmənli, Kimya və metallurgiya mühəndisliyi kafedrasının müdiri Musa Cəfərov və Yüngül sənaye mühəndisliyi və dizayn kafedrasının müdiri Tofiq Mirzəyev iştirak ediblər.
Görüş zamanı iştirakçılar universitetin Ruslanla daim fəxr etdiyini, digər tələbələrimiz üçün vətənpərvərlik nümunəsi olduğunu bildiriblər. Daha sonra ailə ilə birlikdə Ruslanın məzarını ziyarət edərək ruhuna dualar oxuyublar.
Azərbaycan Ordusunun leytenantı olan Ruslan Məmmədov 6 iyun 1997-ci ildə Sumqayıt şəhərində anadan olub. Vətən müharibəsinin başladığı vaxt döyüşlərdə şücaət göstərib, Suqovuşanın azadlığı uğrunda gedən döyüşlərdə savaşıb.
Noyabrın 1-də Ağdərə istiqamətində şəhid olan Ruslan "İgidliyə görə", "Vətən uğrunda”, "Suqovuşanın azad olunmasına görə", "Laçının azad olunmasına görə" medalları ilə təltif edilib.
