Ufa Elm və Texnologiya Universitetinin alimləri Qafqaz regionunda yaşayan insanlarda indiyədək elmə məlum olmayan DNT dəyişiklikləri aşkar ediblər.
Sumqayit24.az xəbər verir ki, bu barədə KP.RU-ya Rusiya Təhsil və Elm Nazirliyindən məlumat verilib.
Məlumata görə, tədqiqatçılar Şimali və Cənubi Qafqazın müxtəlif populyasiyalarına mənsub insanların tam genom ardıcıllığını təhlil ediblər. Araşdırmada iştirak edən DNT nümunələrinin bir hissəsi yüksək dağlıq ərazilərdə və dağətəyi zonalarda yaşayan insanlara aid olub.
Qeyd edilib ki, Şimali Qafqaz anlayışına Rusiyanın Dağıstan, Çeçenistan, İnquşetiya, Kabardin-Balkar Respublikası, Şimali Osetiya və Krasnodar diyarının dağlıq rayonları daxildir. Cənubi Qafqaz dedikdə isə Gürcüstan, Ermənistan, Azərbaycan, Abxaziya və Cənubi Osetiya əraziləri nəzərdə tutulur.
Araşdırma zamanı əsas diqqət bədən hüceyrələrinin oksigen çatışmazlığına reaksiyasını tənzimləyən EGLN1 geninə yönəldilib. Bu gen Tibet və And dağlarında yaşayan əhali arasında da müşahidə olunur. Lakin alimlər Qafqaz xalqlarında, xüsusilə balkarlar arasında, dünyanın digər yüksək dağlıq regionlarında indiyədək qeydə alınmamış yeni gen mutasiyalarını müəyyən ediblər.
İkinci mühüm nəticə genomun sabitliyinin qorunmasında rol oynayan SPRTN geni ilə bağlı olub. Bildirilib ki, Qafqazda əsrlər boyu dağlıq ərazilərdə yaşamış xalqlar üçün ümumi olan gen variantları ilə yanaşı, yalnız bu regiona xas nadir gen variantları da aşkarlanıb.
Tədqiqat Ufa Elm və Texnologiya Universiteti, Rusiya Elmlər Akademiyasının Ufa Federal Tədqiqat Mərkəzinin Biokimya və Genetika İnstitutu, Başqırdıstan Dövlət Tibb Universiteti və Lomonosov adına Moskva Dövlət Universitetinin alimləri tərəfindən həyata keçirilib.
Alimlərin qənaətinə əsasən, region əhalisi minilliklər ərzində dağlıq və düzənlik ərazilər arasında köç edərək çoxsəviyyəli genetik uyğunlaşma mexanizmi formalaşdırıb.
