Bakı–Sumqayıt marşrutu üzrə taksi fəaliyyəti ilə bağlı tətbiq olunan qaydalar sərnişinlərin ciddi narazılığına səbəb olur. Qaydaya əsasən, bir şəhərin buraxılış kartı ilə digər şəhərdə sərnişin götürmək mümkün deyil. Bu isə Bakıdan Sumqayıta gedən taksinin geri qayıdarkən boş qalmasına səbəb olur. Nəticədə sürücülər əlavə yanacaq və vaxt itkisi ilə üzləşir, sərnişinlər isə geri qayıtmaq üçün taksi tapmaqda çətinlik çəkir və daha yüksək qiymətlərlə qarşılaşırlar.
Məsələ ilə bağlı Sumqayit24.az-a danışan nəqliyyat eksperti Eldəniz Cəfərovun fikrincə, vağzaldan vağzala taksilərin hərəkəti üçün şərait yaratmaq mümkündür:
"Vacib deyil ki, Bakı taksisi Sumqayıtın mərkəzinə daxil olsun və ya əksinə. Şəhərlərin sərhədlərinə yaxın ərazilərdə xüsusi şəhərlərarası taksi dayanacaqları təşkil edilə bilər. Sürücülər həmin məntəqələrdə sərnişinləri mindirib-endirə bilərlər".
Nəqliyyat eksperti Rauf Ağamirzəyev isə hesab edir ki, Sumqayıt və Xırdalan vahid Bakı aqlomerasiyasının tərkib hissəsi olduğundan ümumi Bakı kvotasına daxil edilməlidir:
"Bu halda qeyd olunan məsələ öz həllini tapa bilər. Çünki biz bu şəhərlərə inzibati baxımdan ayrı-ayrı yaşayış məntəqələri kimi yanaşsaq da, faktiki olaraq onlar vahid aqlomerasiyanın bir hissəsidir. Əgər paytaxtın 69 kilometr cənubunda yerləşən Ələt qəsəbəsi Bakı hesab olunursa, 30 kilometr şimalda yerləşən Sumqayıtın da vahid məkanın tərkib hissəsi olduğu nəzərə alınmalıdır. Mobillik, logistika və taksi xidmətlərinə də ümumi Abşeron məkanı çərçivəsində yanaşılmalıdır".
R.Ağamirzəyev əlavə edib ki, sürət qatarları və avtobuslar da daxil olmaqla ictimai nəqliyyatın təkmilləşdirilməsi, hərəkət intervallarının azaldılması və bu istiqamətdə yeni layihələrin həyata keçirilməsi taksi xidmətləri ətrafında yaranan problemlərin həllinə müsbət təsir göstərə bilər.
