Sumqayıt şəhər Mərkəzi Uşaq Kitabxanasında “Xoşbəxt nağılların izi ilə” adlı nağıl saatı keçirilib. Sumqayıt24 bu haqda 18 may tarixində xəbər verir.
Tədbirdə “Kids Academy” Tədris Mərkəzinin rus bölməsinin aşağı yaş qrupu şagirdləri və müəllim heyəti iştirak ediblər. Kitabxana mütəxəssisi Səbinə Qasımova 1953-cü ilin noyabr ayından fəaliyyətə başlamış “yubilyar” kitabxananın yaranma tarixi, keçdiyi şərəfli yol haqqında qısa məlumat verib, həyatımızın əvəzsiz bir parçası olan kitabın və kitabxanaların uşaq dünyasında rolu haqqında danışıb.
Sonra uşaqlar şifahi xalq ədəbiyyatının ən qədim və daha çox yayılmış qolu olan nağılların özünəməxsus xüsusiyyətləri haqqında məlumatları dinləyiblər. Balaca fidanlar heyvanlar haqqında tapmacaları cavablandırıb, sevdikləri nağıl qəhrəmanlarının mənfi və müsbət xüsusiyyətlərini söyləyiblər.
