Saat 17:25
Sumqayıt Bələdiyyəsinin Mətbuat Xidmətinin rəhbəri Nizami Rəsulov Sumqayit24.az-a açıqlamasında bildirib ki, Bələdiyyə parkında yerləşən uşaq əyləncə qurğularının vəziyyəti daim nəzarətdə saxlanılır:
"Paylaşımda qeyd olunan yelləncəkdə yaranmış nasazlıq aşkar edildikdən sonra uşaqların təhlükəsizliyi nəzərə alınaraq tam təmir olunaraq istifadəyə verilib.
Görüntüdə əks olunan parça hər-hansı "təmir üsulu" yox, nasaz qurğudan istifadənin qarşısını almaq məqsədilə müvəqqəti xəbərdarlıq xarakteri daşıyır.
Parkın abadlığı, saxlanılması və xüsusilə uşaqların təhlükəsizliyi Sumqayıt Bələdiyyəsi üçün əsas məsələlərdəndir".
***
Sumqayıt şəhərində yerləşən Bələdiyyə parkındakı bəzi uşaq attraksionları qəzalı vəziyyətdədir.
Sumqayit24.az-a müraciət edən sakinlər bildiriblər ki, istirahət guşəsində oyun qurğuları bir müddətdir təmir olunmur:
"Uşaq yelləncəklərindən birinin qoruyucu hissəsi qırılıb. Qırılan yer isə "əski parçası" ilə bərkidilib. Adını da təmir qoyublar. Attraksiondan istifadə edən uşaqlar yıxılıb, yaralana bilər.
Digər qurğunun dayağında da problem yaranıb. Sütunun bir hissəsi qırılıb. Yəni istifadəyə yararsız haldadır".
Şikayətçilərin sözlərinə görə, park istirahət üçün ən çox üz tutulan məkanlardan biridir və burada uşaqların təhlükəsizliyinin təmin olunması vacibdir.
Məsələ ilə bağlı Sumqayıt Bələdiyyəsinə sorğu ünvanlanıb.
