Azərbaycanda köhnə nəqliyyat vasitələrinin utilizasiyası proqramı çərçivəsində avtomobillərin qəbulu davam edir. Prosesin həyata keçirildiyi şəhərlər arasında Sumqayıt da yer alır.
Bunu "Təmiz Şəhər" ASC-nin mətbuat xidmətinin rəhbəri Orxan Cabbarlı Bakıda keçirilən "Təhlükəsiz mobilliyə doğru" adlı tədbirdə deyib.
Onun sözlərinə görə, 2024-cü ilin oktyabr ayında başlayan proqram çərçivəsində ötən həftəyədək ölkə üzrə 30 min avtomobil utilizasiyaya qəbul edilib.
Bildirilib ki, yay aylarında proses daha da intensivləşir. Bölgələrdə uzun illər istifadə olunmadan həyətlərdə qalan nəqliyyat vasitələri xüsusi evakuatorlarla daşınaraq Bakı, Gəncə, Abşeron və Sumqayıtda fəaliyyət göstərən utilizasiya məntəqələrinə təhvil verilir.
Orxan Cabbarlı əlavə edib ki, gələcəkdə utilizasiya zamanı avtomobilin tamlığı da nəzərə alınacaq. Belə ki, nəqliyyat vasitəsinin üzərində mühərrik və sürətlər qutusu olduqda bu, utilizasiya qarşılığında veriləcək məbləğə təsir göstərəcək.
O, həmçinin qeyd edib ki, utilizasiyaya təhvil verilən avtomobillər arasında 2025-ci il istehsalı olan bir neçə "BYD" və "Changan" markalı avtomobil də var. Onun sözlərinə görə, bu nəqliyyat vasitələrinin qəza nəticəsində yararsız vəziyyətə düşdüyü ehtimal edilir və bu hal həmin markaların keyfiyyəti ilə bağlı nəticə çıxarmağa əsas vermir.
