Bu gün Vətən müharibəsi şəhidi Cavid Cəfərovun anadan olduğu gündür.
Cavid Fərhad oğlu Cəfərov 1 dekabr 1993-cü ildə Sumqayıt şəhərində dünyaya göz açıb. O, 2000-2009-cu illərdə 33 nömrəli məktəbdə, 2009-2013-cü illərdə isə Sumqayıt Dövlət Texniki Kollecində Nəqliyyatda daşımaların və idarəetmənin təşkili ixtisası üzrə təhsil alıb.
2016-cı ilin iyul ayında hərbi xidmətə yollanıb. Cavid 2018-ci ilin yanvarında hərbi xidmətini başa vurub və həmin ilin 13 oktyabr tarixindən müddətdən artıq həqiqi hərbi xidmət hərbi qulluqçusu kimi fəaliyyətini davam etdirib.
Cəfərov 2020-ci il sentyabrın 27-də başlanan Vətən müharibəsi zamanı Füzulinin azadlığı uğrunda savaşıb. 1 oktyabr 2020-ci ildə yaralı komandirini xilas edərkən qəhrəmancasına şəhid olub. Sumqayıt Şəhidlər xiyabanında torpağa tapşırılıb.
Ölümündən sonra “Vətən uğrunda” medalı ilə təltif edilib.
