Azərbaycan Silahlı Qüvvələrinin baş leytenantı, Vətən müharibəsi veteranı Hüseyn Abbasqulu oğlu Nəcəfzadə 11 oktyabr 1997-ci ildə Saray qəsəbəsində anadan olub.
Orta təhsilini 2003-2015-ci illərdə Saray qəsəbə 1 saylı tam orta məktəbində alıb. Daha sonra təhsilini Heydər Əliyev adına Azərbaycan Ali Hərbi Məktəbində davam etdirib.
2022-ci il sentyabrın 12-dən 13-nə keçən gecə Ermənistan Silahlı Qüvvələrinin Kəlbəcər rayonu istiqamətində, Azərbaycan-Ermənistan sərhədində Azərbaycan Ordusuna qarşı törətdiyi təxribat nəticəsində şəhid olub. 2022-ci ildən Atlas Nəcəfzadə ilə rəsmi nikahda idi.
Hüseyn ölümündən sonra 3-cü dərəcəli "Vətənə xidmətə görə" ordeni və "Vətən uğrunda" medalı ilə təltif edilib.
Əslən Qubadlı rayonunun Xallava kəndindən olan Azər Zakir oğlu Quliyev 11 oktyabr 1996-cı ildə Sumqayıt şəhərində dünyaya göz açıb. O, Sumqayıt şəhər Peşə liseyində təhsil alıb.
Quliyev 2015-2017-ci illərdə Qazax rayonunda həqiqi hərbi xidmət keçib, həmçinin Aprel döyüşlərinin də fəal iştirakçısı olub. Vətən müharibəsi başlayandan könüllü olaraq ordu sıralarına qatılıb. Azər oktyabrın 23-də Xocavənd uğrunda gedən döyüşlərdə qəhrəmancasına şəhidlik zirvəsinə ucalıb. Sumqayıt Şəhidlər xiyabanında dəfn olunub.
Ölümündən sonra “Vətən uğrunda” və “Xocavəndin azad olmasına görə” medalları ilə təltif edilib.
