Ümummilli lider Heydər Əlirza oğlu Əliyev 10 may 1923-cü ildə Azərbaycan Respublikasının Naxçıvan şəhərində anadan olub.
Heydər Əliyev 1939-cu ildə Naxçıvan Pedaqoji Texnikumunu bitirdikdən sonra Azərbaycan Sənaye İnstitutunun (indiki Azərbaycan Dövlət Neft və Sənaye Universiteti) memarlıq fakültəsinə daxil olub. Lakin İkinci Dünya müharibəsinin başlanmasına görə təhsilini başa çatdıra bilməyib.
Ulu öndər 1944-cü ilin may ayında dövlət təhlükəsizliyi orqanlarında işə başlayıb. O, 1967-ci ildə Azərbaycan SSR Nazirlər Soveti yanında Dövlət Təhlükəsizliyi Komitəsinin sədri vəzifəsinə təyin edilib. Həmin il ona general-mayor rütbəsi verilib.
Heydər Əliyev 1969-cu ildə general-mayor Azərbaycan Kommunist Partiyası Mərkəzi Komitəsinin birinci katibi seçilib. O, 1982-ci ilin dekabrında Sovet İttifaqı KP MK-nın Siyasi Bürosunun üzvü seçilib və SSRİ Nazirlər Soveti sədrinin birinci müavini vəzifəsinə təyin edilib. Lakin 1987-ci ilin oktyabrında, Mixail Qorbaçovun apardığı siyasətə etiraz edərək tutduğu vəzifələrdən istefa verib.
1993-cü ildə Azərbaycan xalqı Heydər Əliyevin hakimiyyətə gətirilməsi tələbini irəli sürüb və o, Bakıya dəvət edilib. Həmin ildən Azərbaycan Respublikası Prezidentinin səlahiyyətlərini həyata keçirməyə başlayıb. Heydər Əliyev iki dəfə - 1993 və 1998-ci illərdə Azərbaycan Respublikasının Prezidenti seçilib. 2003-cü ildə keçirilən prezident seçkilərində ulu öndər səhhətində yaranmış problemlərə görə öz namizədliyini İlham Əliyevin xeyrinə geri götürüb.
Heydər Əliyev 12 dekabr 2003-cü ildə ABŞ-də, Klivlend Klinikasında vəfat edib. Ümummilli lider 15 dekabr Bakıda, Fəxri xiyabanda dəfn olunub.
2016-cı ildə Sumqayıtda Heydər Əliyev Mərkəzinin açılışı baş tutub. Mərkəzdə ümummilli liderin həyatının və dövlətçilik fəaliyyətinin müxtəlif dövrlərini əks etdirən materiallar nümayiş etdirilir.
