Ceyranbatanda yerləşən tədris ocağında şagirdlərin mükəmməl təhsil almaları üçün lazımi şərait yaradılmayıb. Bu haqda 27 sentyabr tarixində Sumqayıt24 Oxu.az-a istinadən məlumat verir.
Söhbət 2 nömrəli tam orta məktəbdən gedir. Təhsil müəssisəsində müəllimlər otağı, akt zalı, hərbi hazırlıq otağı, idman zalı, kitabxana və yeməkxana yoxdur.
240 şagird yerlik məktəbdə hazırda 1.000-dən çox şagird 4 növbə üzrə təhsil alır. Sıxlıq səbəbindən bu il 5 yaşlıların məktəbə qəbulu olmayıb.
Müəllim və valideynlər iddia ediblər ki, şagird sıxlığı səbəbindən dərslər yaxınlıqda olan, əvvəllər tibb məntəqəsi kimi fəaliyyət göstərmiş binada keçirilir.
Məsələ ilə bağlı Abşeron-Xızı Regional Təhsil İdarəsindən bildirilib ki, sözügedən məktəbdə şagird sıxlığı səbəbindən 5-ci ildir yaxınlıqda yerləşən, əvvəllər ambulator mərkəz kimi fəaliyyət göstərmiş fiziki şəxsə məxsus binadan istifadə edilir. Təhsil müəssisəsinin həyətyanı sahəsində 660 şagird yerlik yeni korpusun tikintisi üçün Elm və Təhsil Nazirliyinə təqdimat yazılıb və bunun Dövlət proqramına salınması nəzərdə tutulub.
