Özbəkistan Xəzər dənizinin dibi ilə çəkilən, Sumqayıt və Aktau şəhərlərini birləşdirən beynəlxalq rabitə xəttinə qoşulmağa hazırlaşır.
Bu barədə Səudiyyə Ərəbistanının DataVolt şirkətinin icraçı direktoru Rəcit Nanda gazeta.uz-a açıqlamasında bildirib. Onun sözlərinə görə, Sumqayıtı strateji əlaqə nöqtəsinə çevirəcək bu layihə region üçün alternativ internet yolunun formalaşmasına şərait yaradacaq.
"Hazırda bütün internet trafiki Avropa üzərindən keçir. Bizim üçün alternativ marşrutların inkişafı son dərəcə vacibdir", – deyə Nanda vurğulayıb.
O qeyd edib ki, Xəzərdən keçən fiber-optik xəttə qoşulma Özbəkistana dayanıqlılıq və yüksək təhlükəsizlik təmin edəcək, eyni zamanda ölkənin rəqəmsal transformasiyasına böyük təkan verəcək.
Transxəzər kabel layihəsi 380 km uzunluğunda fiber-optik xətt çəkilişini nəzərdə tutur və bu xətt Azərbaycanın Sumqayıt şəhərindən Qazaxıstanın Aktau limanına qədər uzanacaq. Mütəxəssislər xəttin ötürmə qabiliyyətinin saniyədə 400 terabitə qədər çatacağını bildirirlər.
Layihə mərhələli şəkildə icra olunacaq:
Sahil zonalarının və dəniz dibinin qiymətləndirilməsi,
Mühəndislik layihələndirilməsi,
Yüksək keyfiyyətli davamlı kabellərin quraşdırılması.
Tikintinin 2026-cı ilin sonuna qədər başa çatdırılması planlaşdırılır.
Qeyd edək ki, rabitə xətti Azərbaycan, Gürcüstan, Türkiyə, Qazaxıstan və Türkmənistan ərazilərindən keçən "Rəqəmsal İpək Yolu" layihəsinin əsas komponentlərindən biri kimi nəzərdə tutulur.
