Sumqayıtda orta yaşlı kişinin qətlə yetirilməsinin detalları məlum olub.
Məlumata görə, hadisə 4 fevral 2024-cü ildə baş verib və 1993-cü il təvəllüdlü Habil Qonşəliyev 1976-cı il təvəllüdlü Rüfət Abdullayevi qətlə yetirib.
İstintaq sənədlərinə əsasən, Habil Ceyranbatanda tanışları ilə spirtli içki qəbul etdikdən sonra narkotik vasitə almaq üçün Rüfətlə görüşüb. Görüş zamanı Rüfət narkotikin üzərində olmadığını, əvvəlcədən 10 manat verildiyi halda gedib gətirə biləcəyini deyib. Bu isə tərəflər arasında mübahisəyə səbəb olub.
Mübahisə zamanı Habil Rüfətə yumruq və təpiklə zərbələr endirib. Rüfət aldığı xəsarətlər nəticəsində ölüb. Habil ifadəsində hadisə zamanı sərxoş olduğunu və Rüfətə bir neçə dəfə zərbə vurduğunu etiraf edib.
Hadisədən bir neçə gün sonra Rüfətin meyiti tapılıb.
Habil Qonşəliyev Sumqayıt Ağır Cinayətlər Məhkəməsinin hökmü ilə 18 il müddətinə azadlıqdan məhrum edilib.
Hökmdən təqsirləndirilən şəxsin müdafiəçisi apellyasiya şikayəti verib və şikayət təmin olunmayıb. Daha sonra Ali Məhkəməyə müraciət edən Habil kassasiya şikayətinin geri götürülməsini istəyib. Ali Məhkəmə onun ərizəsini təmin edib.
Mənbə: Demokrat.az
