Corat bağlarında 3 nəfəri öldürüb, 3 nəfəri yaralamaqda şübhəli bilinən Müşfiq Tağıyevin məhkəməsi başlayıb. Sumqayıt24 bu haqda 10 iyul tarixində Apa.az-a istinadən xəbər verir.
Hakim Hafiz Əliyevin sədrliyi ilə Sumqayıt Ağır Cinayətlər Məhkəməsində hazırlıq iclası keçirilib. Təqsirləndirilən şəxsin anket məlumatları dəqiqləşdirilib.
Zərərçəkmiş tərəflər vəsatət qaldıraraq işin yenidən ibtidai istintaqa qaytarılmasını tələb ediblər. Məhkəmə qısa müşavirədən sonra vəsatəti təmin etməyib. İşin baxışa verilməsi ilə bağlı qərar qəbul olunub.
Növbəti məhkəmə iyulun 24-də olacaq.
Xatırladaq ki, hadisə ötən il oktyabrın 28-də baş verib. Fərdi evdə Susana Karakaş və Dağbəyi Fərəcov odlu silahdan qətlə yetiriliblər. Həmçinin Tərlan Fərəcova, Serkan Karakaş, daha sonra isə hadisə yerinə gələn qonşular – Etibar Sarıyev və Mehman Sarıyev yaralanıblar. Türkiyə xəstəxanasına köçürülən Serkan Karakaş da sonradan vəfat edib.
Polis əməkdaşları cinayətdə şübhəli Corat qəsəbə sakini, 37 yaşlı Müşfiq Tağıyevi tutublar.
Daha öncə istintaqın nəticələri barədə məlumat dərc etmişdik.
