Sumqayıtda direktor olmaq istəyən şəxs dələduzluqla üzləşib. Sumqayıt24 bu haqda 18 oktyabr tarixində Qafqazinfo.az-a istinadən xəbər verir.
Musiqi məktəbinin müəllimi Musa Məmmədov həmin müəssisədə vakant olan direktor vəzifəsinə təyin olunmaq istəyib. Eyni zamanda Gəncə Dövlət Universitetinin Tarix fakültəsinin tələbəsi (qiyabi) olan Məmmədov qrup yoldaşı, 44 yaşlı Nəsimi Zeynalov tərəfindən aldadılıb.
Belə ki, Nəsimi Musanın niyyətindən xəbər tutub və ona yüksək vəzifədə çalışan qohumunun olduğunu bildirib. O, 8 min manat müqabilində Musanı direktor təyin etdirəcəyinə söz verib və həmin pulu alıb. Lakin bir müddət sonra Nəsiminin dələduzluğu üzə çıxıb.
Hadisə Gəncədə baş verdiyindən Musanın şikayəti ilə Gəncə Şəhər Baş Polis İdarəsində Cinayət Məcəlləsinin 178.2.4-cü (Dələduzluq xeyli miqdarda ziyan vurmaqla törədildikdə) maddəsi ilə iş açılıb. İş baxılması üçün Gəncə Şəhər Məhkəməsinə göndərilib.
Məhkəmədə Nəsimi pulların hamısını artıq qaytardığını və Musa ilə barışdığını bildirib.
Məhkəmənin hökmü ilə Nəsimi Zeynalova 1 il azadlığın məhdudlaşdırılması cəzası verilib. Onun üzərinə elektron nəzarət cihazı yerləşdirilib və bir sıra inzibati vəzifələr qoyulub.
