Prezident İlham Əliyev Mehdi Hüseynzadə adına Sumqayıt şəhər stadionunda yenidənqurmadan sonra yaradılan şəraitlə tanış olub. Bu haqda 23 oktyabr tarixində Sumqayıt24 Azərtac-a istinadən məlumat verir.
İcra başçısı Zakir Fərəcov dövlət başçısına stadionda görülən işlər barədə məlumat verib.
Bildirilib ki, tamaşaçı tutumu 9502 nəfər olan stadionun ərazisi 6,8 hektardır. İyirmi iki sektordan ibarət stadionda 545 nəfərlik VİP və KİV tribunası da yaradılıb, ərazi abadlaşdırılıb, yaşıllıq zonaları salınıb.
Tikilialtı sahədə cüdo, boks və karate zalları fəaliyyət göstərəcək. Burada, eyni zamanda 2 trenajor otağı, 40 nəfərlik konfrans zalı, inzibati otaqlar, jurnalistlər, hakim, həkim, şərhçilər, məşqçilər üçün otaqlar və digər texniki-köməkçi otaqlar var.
Qeyd edək ki, stadionun tikinti işləri mərhələli şəkildə icra edilməklə 2022-ci ildə başa çatdırılıb.
