Bakı və Sumqayıt ətrafı ərazilərdə ictimai nəqliyyatdan narazılıq səngimir. Sosial şəbəkələrdə yayılan görüntülərdə sərnişinlər avtobusların gecikməsindən və yaranan basabasdan şikayət edirlər. Qadın sərnişinlərdən biri deyir ki, "Gediş haqqını artırdılar, amma xidmət sıfırdır. Avtobusda kişi, qadın bilinmir, hamı bir-birinə yapışıb".
Şəhərlərarası və şəhərdaxili xəttlər üzrə gecikmələr, köhnə avtobuslar və sıxlıq vətəndaşların əsas narazılıq mövzusuna çevrilib.
Rəqəmsal İnkişaf və Nəqliyyat Nazirliyindən bildirilib ki, "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı" çərçivəsində həm paytaxtda, həm də Sumqayıt və Abşeronda avtobus parkının yenilənməsi davam edir. Məlumata görə, bu il Sumqayıt və Abşeron ərazisində 85 müasir, ekoloji təmiz avtobus sərnişinlərin istifadəsinə verilib. İlin sonuna qədər bu sayın artırılması planlaşdırılır.
Lakin bütün bu yenilənmələrə baxmayaraq, ictimai nəqliyyatda əsas problemlər qalmaqdadır.
Nəqliyyat eksperti Eldəniz Cəfərov Musavat.com-a açıqlamasında bildirib ki, mövcud problemlər əsasən daşıyıcı şirkətlərin məsuliyyətsizliyi ilə bağlıdır:
"Sərnişinləri narahat edən əsas məsələ marşrutlarda avtobusların azlığıdır. Dayanacaqlarda insanlar uzun müddət gözləməli olurlar, bu da sıxlığa səbəb olur. Düşünürəm ki, son qərarlar – "brutto" müqavilələrinin imzalanması, İctimai Nəqliyyat Fondunun yaradılması kimi addımlar bu sektorda nizam-intizam yaratmaq məqsədi daşıyır. Şirkətlər artıq məsuliyyətli olmalı, avtobus parklarını yeniləməli və xidmət keyfiyyətini yüksəltməlidirlər".
Beləliklə, görülən işlərə baxmayaraq, həm Bakıda, həm də Sumqayıtda ictimai nəqliyyatda vəziyyət hələ də sərnişinlərin gözləntilərini qarşılamır.
