Sumqayıtda bitən Cənubi Qafqaz qovağı (turanqa) xəstələrə mənfi təsir edir. Sumqayıt24 bu haqda 9 iyun tarixində xəbər verir.
Hər il yay fəslinin astanasında bəzi prospekt və küçələr ağ örpəyə bürünür. Bu ağ örpəyi yaradan məhz turanqadır.
Həkim-allerqoloq Səbinə Babayevanın sözlərinə görə, ağacların tozcuqları allergiyaya həssas insanlarda xəstəlik törədir. Bu xəstəliklər, əsasən, tənəffüs yolları və dəri xəstəlikləri şəklində özünü göstərir:
“Tənəffüs yolları olaraq allergik rinit şəklində, allergik bronxit və astma şəklində, dəridə isə qaşınma, allergik övrə, atopik dermatit şəklində özünü göstərir”.
Məsələ ilə bağlı Sumqayıt Şəhər İcra Hakimiyyətindən BakuTV-yə bildirilib ki, 2019-cu ildə sakinlərin şikayəti ilə bağlı Ekologiya və Təbii Sərvətlər Nazirliyinə müraciət olunub:
Ümumi rəyə əsasən, müxtəlif ərazilərdə allergiyaya səbəb olan ağacların bir hissəsi çıxarılaraq şəhərdən kənara aparılıb. Onların yerinə başqa ağaclar əkilib. Şəhər ərazisində az sayda bu cür ağaclar qalıb. Aidiyyəti qurumlarla birgə məsələ müzakirə olunacaq və müvafiq tədbirlər görüləcək.
