Sumqayıt şəhəri, Nəriman Nərimanov küçəsində parklanma problemi aradan qaldırılıb.
Sumqayit24.az-ın əldə etdiyi məlumata görə, sözügedən küçədə sakinlərin narazılığına səbəb olan neqativ hal polis əməkdaşları tərəfindən aradan qaldırılıb.
Avtomobil parklanması üçün nəzərdə tutulan ərazidə quraşdırılan süni maneələr götürülüb və hüquq pozuntusuna yol verən şəxslə profilaktik iş aparılmaqla barəsində qanunamüvafiq tədbir görülüb.
***
Sumqayıt şəhəri, Nəriman Nərimanov küçəsində parklanma ilə bağlı şikayət var.
Sumqayit24.az-a müraciət edən vətəndaş Könül Əliyevanın iddiasına görə, "Karvan" ticarət mərkəzinin qarşısında parklanma kimi istifadə olunan ərazinin müəyyən hissəsində sakinlərə avtomobillərini saxlamağa icazə verilmir.
"Bu ərazidə yalnız ticarət mərkəzinin rəhbərliyinə məxsus avtomobillər park edilir. Ətrafı dəmir konstruksiyalarla hasarlanan əraziyə digər avtomobillərin daxil olmasına icazə verilmir.
Səbəbini soruşduqda isə ərazinin fövqəladə hal üçün nəzərdə tutulduğu bildirilir. Bəs belədirsə, niyə başqa avtomobillərin orada saxlanılmasına icazə verilir?", - deyə sakin narazılığını ifadə edib.
Şikayətçinin sözlərinə görə, bu vəziyyət ərazidə qarışıqlıq yaratmaqla yanaşı, sakinlərin əlavə narahatlığına səbəb olur. Könül Əliyeva aidiyyəti qurumlardan əraziyə baxış keçirilməsini və mövcud problemin aradan qaldırılmasını xahiş edib.
Məsələ ilə bağlı aidiyyəti quruma sorğu ünvanlanıb.
