Sumqayıt şəhər Heydər Əliyev Mərkəzində "Həssas uşaqlara sosial yanaşma" adlı seminar keçirilib. Sumqayıt24 bu haqda 18 may tarixində xəbər verir.
Tədbirdə ümumtəhsil məktəblərinin rəhbər-pedaqoji heyəti, Beynəlxalq Liberal Maarifçilik Mərkəzinin sədr müavini Taleh Şahməmmədov, Fundamental psixoloji və təlim xidmətləri Mərkəzinin nümayəndəsi, şəhər üzrə Sağlamlıq İmkanları Məhdud Uşaqlar üçün Xüsusi Məktəbin rəhbər heyəti, Xidmət Sahələri üzrə Sumqayıt Dövlət Peşə Təhsil Mərkəzinin mühəndis-pedaqoji heyəti və həssas qrupa daxil olan tələbələrin valideynləri iştirak ediblər.
Çıxış edənlər seminar mövzusunun aktuallığına diqqət çəkərək, məktəb və valideyn arasındakı mövcud kommunikasiyanın gücləndirilməsinin əhəmiyyətindən danışıblar.
Daha sonra inklüziv təhsil və onun faydaları, xüsusi qayğıya ehtiyacı olan uşaqların cəmiyyətə inteqrasiyası, onlarda özünə inam hissinin formalaşdırılması, gələcək məşgulluq məsələləri haqqında təqdimat nümayiş edilib.
Görüş qarşılıqlı diskussiya şəklində davam edib. Sonda xatirə şəkli çəkilib.
