“Azərbaycan bayrağı” ordenli Birinci Qarabağ müharibəsi qazisi Sultan Bəndəliyevin 80 illik yubileyi münasibətilə tədbir keçirilib. Sumqayıt24 bu haqda 14 oktyabr tarixində Sumqayitxeber.com-a istinadən xəbər verir.
Tədbir Sumqayıt Dövlət Dram Teatrında keçirilib. Burada İcra Hakimiyyətinin başçısı Zakir Fərəcov, millət vəkili İmamverdi İsmayılov, şəhid ailələri, qazilər, yubilyarın yaxınları, şəhər ictimaiyyətinin nümayəndələri iştirak ediblər.
Öncə yubilyara həsr olunmuş “Cəsarətin Sultanı” adlı film göstərilib, vətənpərvərlik mövzusunda qısa tamaşa izlənilib.
İcra başçısının birinci müavini Teymur Səmədov, 44 günlük Vətən müharibəsinin iştirakçısı, “Qarabağ” ordenli polkovnik-leytenant Ehtiram Məmmədov, Veteranlar Şurasının sədri, şəhid atası Sovet Şükürov, Sultan Bəndəliyevin döyüş yoldaşları çıxış ediblər.
Bildirilib ki, onun mükəmməl komandir strategiyası Ağdamın Abdal-Gülablı kəndində, Aranzəmin, Pircamal, Naxçıvanik döyüşlərində hərbçilərin dadına çatıb. Əfqanıstanda topladığı savaş təcrübəsi Qarabağ müharibəsində böyük rol oynayıb.
Daha sonra yubilyar səhnəyə dəvət edilib. Ona hədiyyə verilib.
Sonda vətənpərvərlik mövzusunda mahnılar səsləndirilib.
