Sumqayıtda şəhid Yaşar Ağayevin anım tədbiri keçirilib. Sumqayıt24 bu haqda 11 yanvar tarixində DünyaTV-yə istinadən xəbər verir.
“Mən yalnız Vətənimin və xalqımın yolunda şəhid ola bilərəm” adlı mərasim Poeziya Evində baş tutub. Burada şəhidin doğmaları və yaxınları ilə yanaşı, şəhid ailələri, qazilər və ictimaiyyət nümayəndələri də iştirak ediblər. Yaşar Ağayevin həyat və döyüş yolundan filmə baxılıb.
Bildirilib ki, o, 1947-ci ildə Qubadlı rayonunun Məlikəhmədli kəndində doğulub. 1992-ci ildə qardaşı Ağaməmməd və bacanağı Gülağa şəhid olandan sonra qisas üçün I Qarabağ müharibəsinə yollanıb. Fəallığına görə Yaşara baş çavuş rütbəsi verilib. O, Laçının Aşağı Fərəcan və Yuxarı Fərəcan kəndlərinin müdafiəsində, müxtəlif döyüşlərdə iştirak edib.
Yaşar Ağayev Ağdam ətrafında gedən döyüşlərdə 15-dən çox erməni quldurunu məhv edib. Düşmənin əsas hədəf nöqtəsini susdurub. Xeyli sayda silahlarını ələ keçirib. 10 yanvar 1994-cü ildə Ağdam şəhəri uğrunda savaşda şəhadətə ucalıb. Sumqayıt Şəhidlər xiyabanında torpağa tapşırılıb.
