Sumqayıtda idmançını bıçaqlayaraq qətlə yetirən ata və oğlunun barəsində olan hökmdən verilən kassasiya şikayəti üzrə məhkəmə prosesi keçirilib.
APA-nın məlumatına görə, proses Ali Məhkəmədə hakim İlkin Rəcəbovun sədrliyi ilə keçirilib. Təqsirləndirilən Əhəd İsmayılov və Ramil İsmayılov şikayətin geri götürülməsi ilə bağlı məhkəməyə müraciət edib. Məhkəmə onların müraciətini nəzərə alıb.
Qeyd edək ki, birinci instansiya məhkəməsində dövlət ittihamçısı Ramil İsmayılovun 20 il, Əhəd İsmayılovun isə 19 il müddətinə azadlıqdan məhrum edilmələrini istəyib.
Beləliklə, Sumqayıt Apellyasiya Məhkəməsinin qərarı ilə Ramil İsmayılovun cəzası 10 il 6 aydan 18 ilə, Əhəd İsmayılovun cəzası isə 9 ildən 16 ilə dəyişdirilib.
Qeyd edək ki, hadisə 2017-ci ildə şəhərin 21-ci məhəlləsində baş verib. Qətlə yetirilən Rasif Həbibov idmançı olub.
