Bu gün sumqayıtlı şəhidimiz Elvin Zakirovun doğum günüdür.
Elvin Zakirov 1980-ci il avqustun 15-də Sumqayıt şəhərində anadan olub. Sumqayıt şəhər Zülfü Hacıyev adına 17 nömrəli məktəbdə orta, Azərbaycan Dövlət Pedaqoji Universitetində isə ali təhsil alıb. Ailəli idi. İki övladı yadigar qalıb.
2001-ci ildə ali məktəbdən məzun olandan sonra hərbi xidmətə yollanıb.
Hərbi xidmətdən qayıtdıqdan sonra 2001-2002-ci illərdə Sumqayıt şəhər 14 nömrəli məktəbdə fiziki tərbiyə müəllimi kimi pedaqoji fəaliyyət göstərib.
2002-ci ildə öz ərizəsi ilə yenidən hərbi xidmətə qayıdıb. Səhhətində yaranan problemlərlə bağlı 2012-ci ildə ordu sıralarından ehtiyata buraxılıb.
Azərbaycan Ordusunun baş leytenantı olan Elvin Zakirov 2020-ci il sentyabrın 27-də başlanan Vətən müharibəsində könüllü olaraq döyüşlərə qatılıb. 16 oktyabrdan etibarən Füzuli istiqamətində döyüşlərdə iştirak edib. Noyabrın 6-da Xocavənd uğrunda gedən gərgin döyüşlərə qatılaraq burada da qəhrəmanlıq göstərib.
Noyabr ayının 9-da Xocavənd-Şuşa istiqamətində gedən döyüşlərdə qəhrəmancasına şəhid olub. Müəllim-zabit Elvin Zakirov noyabr ayının 20-də Sumqayıt şəhər Şəhidlər Xiyabanında dəfn olunub.
Prezident İlham Əliyevin Sərəncamlarına əsasən, Elvin Zakirov ölümündən sonra "Vətən uğrunda", "Xocavəndin azad olunmasına görə", "Füzulinin azad olunmasına görə", "İgidliyə görə" və "Cəbrayılın azad olunmasına görə" medalları ilə təltif edilib.
