Mehdi Hüseynzadə adına Sumqayıt şəhər stadionunun paltardəyişmə otaqlarında yenilənmə işləri aparılıb.
Sumqayit24.az-a bu barədə "Sumqayıt" Futbol Klubunun mətbuat katibi Zaur Xudiyev məlumat verib.
Onun sözlərinə görə, mart ayında yağan intensiv yağışlar nəticəsində stadionu su basmış, bu səbəbdən paltardəyişmə otaqlarındakı mebellərə ziyan dəymişdi.
"Çempionat davam etdiyi üçün həmin vaxt yenilənmə işlərini həyata keçirmək imkanımız yox idi. Yay fasiləsində paltardəyişmə otaqlarındakı şkaflar yeniləndi, divarlarda isə yüngül kosmetik təmir işləri görüldü", - deyə Zaur Xudiyev bildirib.
Mətbuat katibi əlavə edib ki, klub tərəfindən "SOCAR Polymer Arena"da da yenilənmə işləri həyata keçirilib. Belə ki, paltardəyişmə otaqları və duş kabinələri təmir olunaraq yenilənib.
"Bu cür yenilənmə işləri standart prosedurdur və hər mövsüm həyata keçirilir", - deyə o qeyd edib.
