Sumqayıtda binaları sökən şirkət şikayətləri cavablandırıb. Sumqayıt24 bu haqda 9 yanvar tarixində xəbər verir.
Xəbər verdiyimiz kimi, 4-cü məhəllədə yerləşən üçmərtəbəli binalar sökülür. İşlər “Mahal” MTK tərəfindən görülür. Bina sakinlərindən bəziləri təklif edilən şərtlərlə razılaşıb köçüblər. Narazı qalanlar isə evlərini tərk etmirlər. Onların sözlərinə görə, burada insanlar yaşasalar da, şirkət artıq qapı və pəncərələri söküb. Gecələr içəri narkomanlar girirlər.
“Mahal”ın sədr müavini Ruslan Məmmədov “ARB” Media-ya açıqlama verib:
“Gələcəkdə 3 bina söküləcək, yerində 14-15 mərtəbəli binalar tikiləcək. Burada qanunsuz artırmalar çoxdur. Əgər çıxarışda, misal üçün 45 kv.m qeyd olunubsa, mövcud olan 110 kv.m-dir. Biz də bunu qəbul edirik. 2 illik müqavilə bağlayırıq, tam təmirli ev təklif edirik. Bizim əməkdaşlar sökülmüş qapı, pəncərələri bağlayacaqlar. Bina qəzalı vəziyyətdədir. İstismar vaxtı bitib. Köçənlər də, müqavilə bağlayanlar da var. Hər ay onlara vaxtında kirayə pulları ödənilir. Bizi sakinlər gecikdirirlər. 2 illik müqavilə bağlayırıq. Müəyyən səbəblərdən uzansa, kirayə pulları vaxtı vaxtında ödəniləcək. Xahiş edir ki, 50 yox, 80 kv.m ver. Ona da razılaşırıq. Hər kəs MTK-nı günahlandırır, amma elə deyil”.
