Sumqayıt Kimya Sənaye Parkında yeni fəaliyyətə başlayan istehsal müəssisələrinə mediatur təşkil edilib. Bu haqda 25 oktyabr tarixində Sumqayıt24 İqtisadi Zonaların İnkişafi Agentliyinə (İZİA) istinadən məlumat verir.
Media mənsublarına parkın ümumi fəaliyyəti, görülmüş işlər barədə məlumat verilib.
Bildirilib ki, bu günlərdə dövlət başçısı tərəfindən açılışı olan 3 müəssisə – “UPI - Universal Packing İndustry” QSC, “Azərbaycan Vanhong Ceramics Co.” MMC və “Novus Plastica” MMC tərəfindən Sumqayıt Kimya Sənaye Parkına ümumilikdə 100 milyon manatdan artıq investisiya yatırılıb, 600-ə yaxın daimi iş yeri yaradılıb.
Daha sonra KİV nümayəndələri “Novus Plastica” MMC-nin polimer qatqıların istehsalı müəssisəsində olublar. Qeyd edilib ki, zavod Sənaye Parkının 3,5 hektar ərazisində inşa edilib və burada iki növdə – polietilen borular üçün qara karbon konsentrat qatqısının və sənaye sahəsində qablaşdırmada istifadə edilən polietilen örtüklərin istehsalı həyata keçirilir. İnvestisiya kapitalı 12,1 milyon manatdan çox olan müəssisədə 50-dək insan daimi işlə təmin ediləcək.
Media nümayəndələri, həmçinin ərazidə olan digər rezidentlərinin də layihələri barədə məlumatlandırılıblar.
