Bakı-Sumqayıt yolunda ölümlə nəticələnən qəza törədən Emil Əlizadənin kassasiya şikayətinə baxılıb.
Pravda.az-ın məlumatına görə, Ali Məhkəmədə hakim Ələsgər Novruzovun sədrliyi ilə keçirilən prosesdə qərar elan olunub. Qərara əsasən, kassasiya şikayəti təmin edilməyib.
İttihama görə, hadisə 2021-ci il martın 12-də saat 01 radələrində Binəqədi rayonu, Rəşid İsmayılov ilə Yəhya Hüseynov küçələrinin kəsişməsindəki Bakı-Sumqayıt şosesinin körpü hissəsinin aşağı istiqamətində qeydə alınıb.
Belə ki, Əlizadə Emil Firdovsi oğlunun sərxoş halda və nəqliyyat vasitələrini idarə etmək hüququ olmadan sükanı arxasına əyləşdiyi 99-UZ-598 dövlət nömrə nişanlı "BMW" markalı avtomobil idarəetmədən çıxaraq körpüdən aşıb. Nəticədə avtomobildə olan sərnişin - Cəlilabad rayon sakini, 1994-cü il təvəllüdlü Şahin Mədətov hadisə yerində ölüb.
Sürücü və digər sərnişin isə ağır vəziyyətdə xəstəxanaya çatdırılıblar.
Bakı Ağır Cinayətlər Məhkəməsinin hökmü ilə o, 6 il 6 ay müddətinə azadlıqdan məhrum edilib. Bakı Apellyasiya Məhkəməsinin qərarına əsasən, apellyasiya şikayəti təmin edilib, hökm dəyişdirilib və Emil Əlizadənin cəzası 5 il 1 aya endirilib.
Xatırlatma: Mətbuatda yayılan məlumata görə, Emil Əlizadə xəstəxanaların birində həkim işləyib.
