Sumqayıtda vətəndaşın ölüm faktına aydınlıq gətirilib. Sumqayıt24 bu haqda 18 iyun tarixində Apa.az-a istinadən xəbər verir.
Daxili İşlər Nazirliyindən (DİN) bildirilib ki, 37 yaşlı Elvin İsgəndərovun iyunun 14-də polis bölməsində xəsarətlərdən ölməsi iddiaları həqiqəti əks etdirmir.
Belə ki, kafelərin birində bir neçə sərxoş şəxs münaqişə edib. Bu səbəbdən həmin ünvana polis əməkdaşları yaxınlaşıblar. Gərginlik aradan qaldırıldıqdan sonra onlar bölməyə dəvət ediliblər. Onlardan E. İsgəndərov bölmənin qarşısında dayandığı yerdə qəfil müvazinətini itirərək yerə yıxılıb. Hadisə bir neçə nəfərin – qohumlarının, dostlarının, qardaşlarının yanında və müşahidə kamerasının altında baş verib.
Təcili tibbi yardım dəvət olunsa da, kişi vəfat edib. Həkim rəyinə əsasən, ölüm səbəbi qaraciyər serrozu və ürək tutması olub.
“Qeyd olunanları nəzərə alaraq, vətəndaşın ölümündə hər hansı kənar müdaxilə olması iddiaları əsassızdır.
Hazırda ölüm faktı aidiyyəti üzrə araşdırılır, kamera görüntüləri də araşdırmaya təqdim edilib”, – deyə DİN vurğulayıb.
