Sumqayıtın qəsəbələrindən birində yaranan vəziyyət sakinlərin narahatlığına səbəb olub.
Sumqayit24.az-a müraciət edən vətəndaşların iddiasına görə, problem Kimyaçılar qəsəbəsində, sakinlər arasında "Şüşə zavodu" kimi tanınan ərazidə fəaliyyət göstərən beton sexi ilə bağlıdır.
Belə ki, vaxtilə şüşə zavodu kimi fəaliyyət göstərən ərazidə hazırda bir neçə sex var və onlar müxtəlif sahələr üzrə icarəyə verilib. Həmin icarə obyektlərindən birində isə beton istehsalı aparılır.
İddiaya əsasən, sexdə istehsal prosesi zamanı ətrafa intensiv şəkildə toz yayılır. Bu isə yaxınlıqda yaşayan sakinlərin gündəlik həyatına mənfi təsir göstərir.
"Toza görə nə maşın yuya bilirik, nə həyətdə otura bilirik, nə də uşaqlar rahat şəkildə çöldə oynaya bilirlər", – deyə sakin narahatlığını ifadə edib.
Vətəndaşlar aidiyyəti qurumlardan məsələni araşdırmağı və problemin aradan qaldırılması üçün müvafiq tədbirlərin görülməsini xahiş edirlər.
Məsələ ilə bağlı aidiyyəti quruma sorğu ünvanlanıb.
