Ölkəyə külli miqdarda narkotik keçirməyə cəhd edən mütəşəkkil qaçaqmalçı qrupun üzvləri həbs ediliblər. Bu haqda 28 iyun tarixində Sumqayıt24 Report.az-a istinadən məlumat verir.
Hadisə iyunun 24-də gecə saatlarında baş verib. Xəzər dənizində Sumqayıt şəhəri və Yaşma qəsəbəsi istiqamətində hərəkət edən qayıqlara Dövlət Sərhəd Xidmətinin hərbi qulluqçuları tərəfindən “DAYAN” komandası verilməsinə baxmayaraq, verilmiş əmrə tabe olmayaraq, qayıqlarında özləri ilə gətirdikləri narkotik vasitələri suya ataraq qaçmağa çalışan İran vətəndaşları – 41 yaşlı Nuri Əbruntən, 40 yaşlı Bəhmən Kaseb və Aunəq Abdulrəhim (yaralı halda) təqibetmə əməliyyatı zamanı ələ keçiriliblər.
Həmin vaxt həyata keçirilən əməliyyat-axtarış tədbirləri nəticəsində Yaşma qəsəbəsi ərazisində Azərbaycan vətəndaşı olan 2 mülki şəxsin – 42 yaşlı Elxan Əliyev və 48 yaşlı Esmira Məmmədovanın şübhəli şəkildə dəniz sahilində və suyun içində fənərlərlə işarə verərək olduqları yeri bəyan etmələri aşkar edilib və onlar saxlanılıblar.
İran vətəndaşları tərəfindən ölkəyə gətirilmiş narkotik vasitə olan çətənə bitkisi 4 ədəd müxtəlif rəngli torbalarda təxminən 165 kiloqram çəkidə Novxanı qəsəbəsi yaxınlığında aşkar edilərək götürülüb.
Başlanmış cinayət işi üzrə Bəhmən Kaseb və Nuri Əbruntən Cinayət Məcəlləsinin 206.3.2, 234.4-1 və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə, Azərbaycan Respublikasının vətəndaşları Elxan Əliyev və Esmira Məmmədovaya isə Cinayət Məcəlləsinin 32.5, 206.3.2 (qabaqcadan əlbir olan bir qrup şəxs tərəfindən qaçaqmalçılığa köməklik) və 234.4-1-ci (narkotik vasitələrin və psixotrop maddələrin qanunsuz dövriyyəsi xüsusilə külli miqdarda törədildikdə) maddələri ilə təqsirləndirilən şəxs qismində cəlb olunaraq, müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında barələrində həbs qətimkan tədbiri seçilib.
Aunəq Abdulrəhim hazırda Dövlət Sərhəd Xidmətinin hərbi qulluqçularının xüsusi müşahidəsi altında saxlanmaqla xəstəxanada müalicəsi davam etdirilir.
Cinayətin digər iştirakçılarının ifşa olunmaları istiqamətində zəruri istintaq və əməliyyat-axtarış tədbirləri davam etdirilir.
