Sumqayıtda bir ildən artıqdır çətin vəziyyətdə yaşayan 64 yaşlı Etibar Abbasovun taleyi yerli sakinlərin diqqətini çəkib.
Sumqayit24.az-a izləyicilərdən daxil olan məlumata görə, Etibar Qurban oğlu Abbasov əslən Naxçıvan Muxtar Respublikasının Şərur rayonunun İbadulla kəndindəndir. O, bir ildən çox əvvəl İstanbuldan Sumqayıta gəlib. Lakin şəxsiyyət vəsiqəsini, xarici pasportunu və mobil telefonunu itirdikdən sonra çətin vəziyyətə düşüb.
Onun sözlərinə görə, sənədləri və maddi imkanı olmadığı üçün hazırda evinə qayıda bilmir. Etibar Abbasov bir müddətdir 41-ci məhəllədə, küçədə qalır. Ərazi sakinləri ona yemək və digər gündəlik ehtiyaclarla kömək edirlər.
Etibar Abbasov özünü müəllim kimi təqdim edir. O, uzun illər şərqşünaslıq üzrə dərs dediyini, aralarında əcnəbilərin də olduğu 183 tələbəsinin olduğunu bildirir.
64 yaşlı kişi spirtli içki qəbul etmədiyini və sakit həyat sürdüyünü deyir. Bununla belə, o, yaşadığı ərazidə zaman-zaman bəzi şəxslərin ona narahatlıq yaratdığını da iddia edir.
Etibar Abbasovun sözlərinə görə, bir müddət əvvəl Əmək və Əhalinin Sosial Müdafiəsi Nazirliyinin əməkdaşları onunla görüşüblər.
"Gəlmişdilər, mənimlə danışdılar. Dedilər ki, bir də gələcəyik", – deyə o bildirib.
Hazırda Etibar Abbasov sənədlərinin bərpasına və yaşadığı çətin vəziyyətdən çıxmasına kömək olunacağına ümid edir. Yerli sakinlər isə onun vəziyyətinin aidiyyəti qurumların diqqətində saxlanılmasını istəyirlər.
Məsələ ilə bağlı Əmək və Əhalinin Sosial Müdafiəsi Nazirliyinə sorğu ünvanlanıb.
