Qanunsuz abortlar bir çox ciddi təhlükələrə səbəb ola bilər. Bunlar arasında ən önəmliləri adətən peşəkar tibbi şəraitdə həyata keçirilmədiyi üçün infeksiya, ağır qanaxma, orqanın zədələnməsi kimi fəsadlarla nəticələnə bilər. İkincisi, abortların qadınlar üzərində psixoloji təsirləri ciddidir. Qanunsuz abortların nəticəsi olaraq, qadınlarda gələcəkdə hamiləlik problemləri, o cümlədən infertillik və ya doğuş zamanı komplikasiyalar baş verə bilər.
Azərbaycanda ümumi abort statistikası göstərir ki, 2023-cü ildə ölkə üzrə 73,816 abort qeydə alınıb. Bu göstərici əvvəlki illərlə müqayisədə artım nümayiş etdirir, məsələn, 2022-ci ildə abortların sayı 57,999 olub.
Qanunsuz abortların ümumi abortlar içindəki nisbətini müəyyən etmək çətin olsa da, bəzi mənbələr qeyd edir ki, çox sayda abort tibbi qeydə alınmadan, qeyri-rəsmi şəraitdə həyata keçirilir.
Modern.az-a açıqlamasında Vəkillər Kollegiyasının üzvü, vəkil Rəşad Əliyev bildirib ki, qanunsuz abort etməyə görə, Cinayət Məcəlləsinin 141-ci maddəsi ilə məsuliyyət yaradır. Belə ki, həkim tərəfindən tibb müəssisələrindən kənarda abort etməyə görə beş yüz manatdan min manatadək miqdarda cərimə və ya altı ayadək , müddətə islah işləri cəzaı nəzərdə tutulub.
Bundan başqa, xüsusi ali tibbi təhsili olmayan şəxs tərəfindən abort etmə min manatdan min beş yüz manatadək miqdarda cərimə və ya üç yüz altmış saatdan dörd yüz saatadək müddətə ictimai işlər və ya bir ilədək müddətə islah işləri ilə cəzalandırılır.
Rəşad Əliyev deyib ki, qeyd edilən əməllər nəticəsində, zərərçəkmiş şəxsin sağlamlığına ehtiyatsızlıqdan ağır zərər vurulduqda iki min manatdan üç min manatadək miqdarda cərimə və ya iki ilədək müddətə islah işləri və ya bir ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, və ya edilməməklə bir ilədək müddətə azadlığın məhdudlaşdırılması və ya bir ilədək müddətə azadlıqdan məhrum etmə cəzası təyin edilə bilər.
Həmin əməllər ehtiyatsızlıqdan zərərçəkmiş şəxsin ölümünə səbəb olduqda isə üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə beş ilədək müddətə azadlıqdan məhrum etmə ilə cəzalandırılır.
