Sumqayıtda gənclərin ənənəvi sənətlə müasir texnologiyanı bir araya gətirdiyi maraqlı layihə başa çatıb.
Sumqayit24.az xəbər verir ki, Sağlam Düşüncə Gənclər Təşkilatının könüllüləri Kaan Arslantürk və Sophia Pınar Saneiyin təşəbbüsü və təlimçiliyi ilə keçirilən 4 günlük "Sənət Vörkşop"da 15–20 yaş arası gənclər öz yaradıcı ideyalarını fərqli üsullarla gerçəkləşdiriblər.
Təlimlərdə iştirakçılar sadəcə rəsm çəkməklə kifayətlənməyiblər. Onlar ekspressionizm və miniatür sənətini öyrənib, ənənəvi əsərləri rəqəmsal formata keçirib, animasiya və video hazırlayıb, süni intellekt alətlərindən və Artırılmış Reallıq (AR) texnologiyasından istifadə edərək öz işlərini yaradıblar.
Hazırlanan layihələr isə Sumqayıt Gənclər Evində keçirilən sərgidə nümayiş olunub.
Sərgidə ənənəvi və rəqəmsal əsərlərlə yanaşı, animasiya çarxları və AR texnologiyası vasitəsilə "canlanan" yaradıcı işlər də ziyarətçilərə təqdim edilib. Beləliklə, kağız üzərində başlayan bəzi əsərlər texnologiyanın köməyi ilə tamamilə fərqli formada tamaşaçı qarşısına çıxıb.
