İcra başçısının keçmiş müavini Gündüz Əliyev külli miqdarda mənimsəmədə təqsirləndirilir. Bu haqda 5 sentyabr tarixində Sumqayıt24 Apa.az-a istinadən məlumat verir.
Onunla birgə “Sumqayıt Tibb Mərkəzi”nin sabiq baş mühasibi Gülnarə Bayramova və tanışları Elxan Əsədov ittiham olunurlar.
Hakim Aynur Rzayevanın sədrliyi ilə prosesə Sumqayıt Ağır Cinayətlər Məhkəməsində baxılacaq. Məhkəmənin baxış iclası sentyabrın 12-nə təyin edilib.
Onların sahibkarlıq fəaliyyəti adı altında 2012-2019-cu illər ərzində keçirilmiş dövlət satınalmaları və müqavilələr üzrə xüsusilə külli miqdarda pul vəsaitlərini nağdlaşdıraraq mənimsəmələrinə əsaslı şübhələr müəyyən edilib.
Cinayət işi materiallarına əsasən, Gülnarə Bayramova və Gündüz Əliyev Elxan Əsədov vasitəsilə təsis etdikləri 41 hüquqi şəxsin qanuni fəaliyyətlə məşğul olması görüntüsü yaradaraq Sumqayıt şəhər Səhiyyə Şöbəsindən 5 milyon 716 min 684 manat məbləğində pul vəsaitinin həmin şirkətlərə köçürülməsinə nail olublar.
Köçürülmüş pul vəsaitinin bir hissəsi, yəni 1 milyon 613 min 334 manat məbləğində hissəsi Elxan Əsədov və digərləri vasitəsilə nağdlaşdırılmaqla mənimsənilib.
Cinayət yolu ilə əldə edilən mənimsənilmiş pul vəsaitinin 1 milyon 35 min manat məbləğində hissəsinin müxtəlif əqdlər bağlamaqla həyata keçirilən maliyyə əməliyyatları nəticəsində ayrı-ayrı şəxslərin bank hesablarından məxaric edərək leqallaşdırması ibtidai istintaq zamanı sübuta yetirilib.
İş üzrə toplanmış mötəbər sübutlar əsasında Gülnarə Bayramova və Gündüz Əliyevə Cinayət Məcəlləsinin “xüsusilə külli miqdarda ziyan vurmaqla mənimsəmə”, “xeyli miqdarda cinayət yolu ilə əldə edilmiş əmlakı leqallaşdırma” və digər maddələri, Elxan Əsədova isə həmin Məcəllənin “xüsusilə külli miqdarda ziyan vurmaqla mənimsəməyə köməkçilik”, “ağır nəticələrə səbəb olan vəzifə səlahiyyətlərindən sui-istifadə etməyə köməkçilik” və digər maddələrlə yekun ittiham elan edilib.
