Ailəsi ilə Almaniyada yaşayan 9 yaşlı şahmatçı Sona Bəşirova Berlində ikiqat çempion olub. Gənc istedad artıq ikinci ildir Almaniya paytaxtının çempionu titulunu qazanır.
Sumqayit24.az xəbər verir ki, Sona Bəşirova DSAM (Həvəskarlar arasında Almaniya Açıq Çempionatı) finalına, Almaniyanın on yaşadək ümumi çempionatına və on yaşadək qızlar arasında keçirilən çempionata vəsiqə qazanıb. İstedadlı şahmatçı heç bir oyunda məğlub olmayaraq, beş mümkün xaldan 4.5 xal toplayaraq birinci yeri qazanıb və bununla da Berlinin ikiqat çempionu olub.
Bundan bir neçə gün əvvəl o, Berlində on yaşadək uşaqlar arasında keçirilən açıq çempionatında üçüncü yerə layiq görülüb. S.Bəşirova burada yeganə qız iştirakçı idi. Ondan əvvəl isə Sona Potsdam şəhərində DSAM çərçivəsində böyüklər arasında keçirilmiş turnirdə öz qrupunda qalib olub.
Sona hər gün üç-beş saat turnirə hazırlaşıb. O bildirib ki, ötənilki titulunu qoruyaraq, yenidən Berlin çempionu olduğu üçün böyük sevinc hissi duyur.
Sona aprel ayında "Grenke Open" turnirində iştirak etmək üçün Karlsrue şəhərinə gedəcək. Burada onun sumqayıtlı qrosmeyster Şəhriyar Məmmədyarov və Maqnus Karlsen kimi dünya şahmat ulduzları ilə ilk dəfə real həyatda görüşmək imkanı olacaq. Gənc şahmatçı B qrupunda yarışacaq.
