Saray qəsəbəsində 17 yaşlı yeniyetmənin həmyaşıdı tərəfindən döyülərək ağır xəsarətlər aldığı bildirilir.
Sumqayit24.az-a daxil olan məlumata görə, Ə.Z. həmyaşıdı tərəfindən "Saray-H" MTK yaşayış kompleksinin həyətində döyülüb.
Qeyd olunub ki, hadisə nəticəsində Ə.Z. müxtəlif dərəcəli xəsarətlər alıb.
Sumqayit24.az-a DİN-in Mətbuat Xidmətinin əməkdaşı Lumu İsrəfilli bildirib ki, Abşeron rayonu ərazisində 17 yaşlı yeniyetməyə fiziki zor tətbiq edilməsi ilə bağlı polisə məlumat daxil olub.
"Əməli törətməkdə şübhəli bilinən həmyaşıdı polis əməkdaşları tərəfindən müəyyən edilib. Həmin şəxs valideynləri ilə birgə polis orqanına dəvət olunaraq izahatı alınıb. Xəsarətin dərəcəsini müəyyən etmək məqsədi ilə müvafiq ekspertiza təyin edilib. Araşdırmanın nəticəsindən asılı olaraq əmələ hüquqi qiymət veriləcək", - deyə qurum qeyd edib.
TƏBİB-dən isə bildirilib ki, 2009-cu il təvəllüdlü şəxs (kişi) 11.08.2026-cı il tarixində saat 02:30 radələrində Sumqayıt Tibb Mərkəzinin nəzdində olan Uşaq Xəstəxanasına hospitalizasiya olunub:
"Dəqiqləşdirilməmiş kəllədaxili travma, alt çənənin çıxığı və dişin travmatik çıxığı diaqnozları təyin edilən pasiyent daha ixtisaslı tibbi xidmət almaq üçün Kliniki Tibbi Mərkəzə təxliyə olunub.
Tibb müəssisəsinin müvafiq şöbəsində ona zəruri tibbi xidmətlər göstərilib. Hazırda müalicəsi davam etdirilir, vəziyyəti stabil qiymətləndirilir".
