Sumqayıt Dövlət Universitetində (SDU) “Technoxian World Robot Championship” yarışı ilə bağlı infosessiya keçirilib. Sumqayıt24 bu haqda 21 dekabr tarixində xəbər verir.
Tədbir Rəqəmsal İnkişaf və Nəqliyyat Nazirliyinin dəstəyi və Azərbaycan Robototexnika Mühəndisliyi Akademiyasının təşkilatçılığı ilə baş tutub. SDU-nun prorektoru, dosent Elmar Xəlilov bildirib ki, robototexnika sahəsi sürətlə inkişaf edir. Bu sahənin inkişafı isə, sənayenin avtomatlaşdırılmasına, sürətlə inkişafına öz təsirini göstərir. Son dövrlərdə Azərbaycanda robototexnika üzrə əhəmiyyətli irəliləyişlər var. Təbii ki, SDU-da bu istiqamətdə böyük işlər həyata keçirilir. Universitetdə İnnovasiya Yaradıcılıq Mərkəzi fəaliyyət göstərir. Burada tələbələr öz ideyalarını gerçəkləşdirərək müxtəlif layihə və yarışlarda uğurla təmsil olunurlar.
Azərbaycan Robototexnika Mühəndisliyi Akademiyasının texniki rəhbəri Məhəmməd Hacıyev və yarışmanın koordinatoru Məryəm Sulxayeva qaydalar, layihələr və hazırlıqdan danışıblar.
Bildirilib ki, “Technoxian World Robot Championship” yarışı ilk dəfədir ki ölkəmizdə keçiriləcək. Birinciliyin Azərbaycan üzrə final mərhələsi 2024-cü ilin may ayında olacaq. Bunadək təlimçilər ali təhsil müəssisələrində təlim və görüşlər təşkil edəcəklər.
Sonda tələbələri maraqlandıran suallar cavablandırılıb.
Qeyd edək ki, yarışın final mərhələsi 2024-cü ildə Hindistanın Dehli şəhərində keçiriləcək.
